Odo of Cheriton

1. QUALITER ELEGERUNT SIBI REGEM LIGNA.
Perry 262

Iuerunt ligna, ut ungerent super se regem. Dixerunt Olive: Impera nobis. Que respondit: Numquid possum relinquere pinguedinem meam, qua Dii utuntur et homines, ut inter Ligna promouear? Venerunt ad arborem Ficus (sic pro Ficum), et dixerunt: Super nos [regnum] accipe. Respondit: Numquid possum deserere dulcedinem meam fructusque suauissimos, ut inter Ligna promouear? Venerunt ad Vitem, ut imperaret eis. Que respondit: Nunquid possum deserere uinum quod letificat Deum et homines? Et noluit promoueri. Dixeruntque Ligna ad Rampnum: Impera nobis. Respondit Rampnus: Si uere me regem constituitis, uenite, et sub umbra mea quiescite; si non uultis, egrediatur ignis de Rampno, et deuoret cedros Libani.


1e. DE ABBATE, CIBO ET MONACHIS.
Perry

Et applicatur malis presidentibus et successoribus peioribus
Quidam Abbas dedit Monachis suis tria fercula. Dixerunt Monachi: Iste parum dat nobis. Rogemus Deum quod cito moriatur, et siue ex hac causa, (siue) ex alia, cito mortuus est. Substitutus est alius qui tantum dedit duo fercula. Irati Monachi et contristati dixerunt: Nunc magis orandum est, quia unum ferculum subtractum est, Deus subtrahat ei uitam suam. Tandem mortuus est. Substitutus est tertius, qui duo subtraxit. Irati Monachi dixerunt: Iste pessimus est inter omnes, quia fame nos interficit. Rogemus Deum quod cito moriatur. Dixit unus Monachus: Rogo Deum quod det ei longam uitam et manu teneat eum nobis. Alii admirati querebant quare hoc diceret. Qui ait: Video quod primus fuit malus, secundus peior, iste pessimus. Timeo, cum mortuus fuerit, alius peior succedet qui penitus fame nos perimet.
Vnde solet dici: Selde cumet se betere, hoc est: Raro succedit melior.


2. DE NISO ET COLUMBA ET DUCE.
Perry 588

Applicatur minantibus solum et non facientibus iusticiam.
Nisus semel rapuit unam Columbam et deuorauit. Alie Columbe acceperunt consilium cui conquererentur. Et dixerunt: Duci. Est autem auis Dux cum magno capite et maior Aquila, et ideo Columbe conqueste sunt ei de Niso, quod faceret iusticiam, quoniam sociam suam interfecit. Audita querela, respondit Dux cum magna ingurgitatione: Cloc! Quo audito, dixerunt Columbe: Quam bene intonuit! Certe faciet sibi de Niso unum morsellum. Iterum uenit Nisus, et aliam Columbam rapuit. Accesserunt Columbe ad Ducem, postulantes quod faceret iusticiam. Et respondit: Cloc! Dixerunt Columbe: Ecce quam strenue com[m]inatur; optime faciet iusticiam. Nisus terciam Columbam accepit. Columbe tercio uenerunt ad Ducem, ut uindictam acciperet. Et ipse respondit: Cloc! Audientes dixerunt: Quid est quod semper dicit Cloc, et nunquam iusticiam facit? Recedamus a regno suo, et infestemus eum sicut falsum et stultum. Hinc est quod Columbe et cetere Aues, quando Ducem uident, eum infestant.
Sic plerique, quando pauperes clamant quod reges et maiores faciant iusticiam de iniuriantibus, dicunt: Faciemus, faciemus, et sic dicunt unum cloc. Nunquam tamen faciunt. Hoc et ad falsos promissores refertur qui dicunt: Cloc, cloc, dabo, dabo; et nichil aliud habetur a talibus nisi unum cloc.

14. DE FILIO BUFONIS ET SOTULARIBUS.
Perry 591

Contra falsum iudicium rationis ex affectione.
Contigit quod animalia celebrauerunt concilium. Bufo misit illuc filium suum. Sed oblitus sotulares suos nouos, quesiuit Bufo aliquod animal uelox, qui (sic) posset ad concilium accele(b)rare; uidebatur sibi quod Lepus bene curreret. Vocauit eum et, mercede constituta, dixit ei quod deferret sotulares nouos filio suo. Respondit Lepus: Quomodo potero discernere filium tuum in tali concilio? Dixit Bufo: Ille qui pulcherrimus est inter omnia animalia est filius meus. Dixit Lupus (sic): Numquid Columba uel Pauo est filius tuus? Respondit: Nequaquam, quoniam Columba habet nigras carnes, Pauo turpes pedes. Dixit Lepus: Qualis est igitur filius tuus? Et dixit Bufo: Qui tale habet caput quale est meum, talem uentrem, tales tibias, tales pedes, ille pulcher filius meus. Illi deferas sotulares. Venit Lepus cum sotularibus et narrauit Leoni et ceteris bestiis qualiter Bufo pre ceteris filium suum commendauit. Et ait Leo: Ki Crapout eime, Lune li semble.
Si quis amat Ranam, Ranam putat esse Dianam.

21. DE CASEO ET RATO ET CATO.
Perry 594

Contra prelatos aggrauantes inferiores.
Quidam habuit Caseum in archa, et uenit Ratus. Incepit eum rodere. Cogitauit paterfamilias quid faceret. Tandem habito consilio, posuit intus Murilegum, et ille deuorauit Ratum et Caseum.


63. DE MURE QUI VOLUIT MATRIMONIUM CONTRAHERE.
Perry 619

Contra illos qui superbe agunt, alta cogitantes et sapientes et cetera.
Mus semel uoluit matrimonium contrahere et cogitauit quod maritum acciperet fortissimum; et cogitauit penes se quid esset strenuissimum. Tandem uidebatur sibi quod Ventus, quia prosternit cedros, turres, domos. Misit nuncios Vento quod esset maritus eius. Dixit Ventus: Quare uult mecum contrahere? Dixerunt nuncii: Quia inter omnes creaturas es fortissima. Respondit Ventus: I(m)mo castrum Narbonense forcius est me, quia iam plus quam per mille annos stetit aduersum me et [s]cindit et confringit uires meas, et nunquam potui eum (sic) prosternere. Reuersi sunt nuncii et retulerunt responsum, et dixit Mus: Ex quo forcior est Turris, volo quod sit maritus meus. Significabat hoc Turri, et ait Turris: Quare uult mecum contrahere? Et responsum: Quia res es fortissima et forcior Vento. Et ait Turris: Certe Mures sunt forciores me, quia tota die me perforant et frangunt, et faciunt uiam per me. Et ita, habito consilio, oportebat quod Mus Murem sibi associaret.

VERSION WITH CAT AT THE END